पुण्यात ‘ वाबळेवाडी पॅटर्न ‘ ची मुहूर्तमेढ रोवणारे वारे गुरुजी दोषमुक्त
पुण्यात ‘ वाबळेवाडी पॅटर्न ‘ ची मुहूर्तमेढ रोवणारे वारे गुरुजी दोषमुक्त
पुणे जिल्ह्यातील एका शाळेचे प्रकरण संपूर्ण राज्यभरात गाजलेले होते. पुणे जिल्ह्यातील शिरूर तालुक्यातील वाबळेवाडी शाळेत अनियमीततेच्या बाबतीत तत्कालीन मुख्याध्यापक असलेले दत्तात्रेय वारे यांना पुणे जिल्हा परिषदेने दोषमुक्त केलेले असून त्यांच्यावरील कुठलेही आरोप सिद्ध झालेले नाहीत त्यानंतर मुख्य कार्यकारी अधिकारी रमेश चव्हाण यांनी वारे दोषमुक्त असल्याचे आदेश काढलेले आहेत.
शिरूर तालुक्यातील वाबळेवाडी जिल्हा परिषदेची शाळा गुणवत्तेत सर्वात पुढे असून वाबळेवाडी पॅटर्न म्हणून या शाळेचा संपूर्ण जिल्ह्यात नावलौकिक आहे असे असताना शाळेचे मुख्याध्यापक दत्तात्रय वारे यांनी शाळेबाहेरील एका व्यक्तीकडून शुल्क घेतल्याचे तोंडी आरोप करण्यात आलेले होते त्यानंतर जिल्हा परिषद सदस्यांनी या प्रकरणी चौकशीची देखील मागणी केलेली होती.
दरम्यानच्या काळात दत्तात्रय वारे यांचे निलंबन करण्यात आले आणि त्यांच्या पाठीमागे विभागीय चौकशी सुरू करण्यात आलेली होती. मुख्याध्यापक दत्तात्रय वारे यांच्या अथक परिश्रमामुळेच शाळेला आंतरराष्ट्रीय दर्जा देखील प्राप्त झालेला होता आणि त्याचा परिणाम शाळेतील विद्यार्थ्यांवर देखील सकारात्मक होत आहे ही बाब शासनाच्या निदर्शनास आणून देण्यात आली.
उपमुख्यमंत्री देवेंद्र फडणवीस यांनी देखील स्वतः खुलासा करून हे प्रकरण अधिक लांबणार नाही याची ग्वाही दिलेली होती. तब्बल दोन वर्ष विभागीय चौकशी सुरू राहिली आणि अखेर वारे यांनी कामात हलगर्जीपणा केला तसेच कर्तव्यात कसूर केली असे कुठल्याही पद्धतीचे आरोप त्यांच्याविरोधात सिद्ध झालेले नाहीत त्यामुळे ते दोषमुक्त असण्याचे आदेश अखेर काढण्यात आलेले आहेत.
Comments
Post a Comment